1. Qiyməti bazara görə qoyun
Alıcıların çoxu eyni modelin bir neçə elanını yan-yana müqayisə edir. Qiymət bazardan xeyli bahadırsa, elanınız baxılır, amma zəng gəlmir.
Elanın səhifəsindəki "Bazar qiyməti" düyməsi saytdakı oxşar elanlara görə orta qiyməti göstərir. Qiyməti ondan ən azı 3% aşağı qoysanız, elanda yaşıl "Yaxşı qiymət" nişanı görünür və elan "Bazardan ucuz" bölməsinə düşür.
2. Ən azı 8–10 şəkil çəkin
Şəkilləri gündüz, kölgəsiz yerdə və təmiz maşınla çəkin. Ön, arxa, iki yan, salon, sükan və cihazlar paneli (yürüş görünsün), mühərrik bölməsi və təkərlər mütləq olsun.
Birinci şəkil elanın üz qabığıdır — maşını 3/4 bucaqdan (ön və yan birlikdə) göstərən şəkil ən çox klik toplayır.
3. Təsviri dolğun yazın
Servis tarixçəsi, son dəyişdirilən hissələr, rənglənmiş detallar, qəza olub-olmadığı — bunları açıq yazmaq alıcının etibarını artırır və boş zəngləri azaldır.
4. Bütün xanaları doldurun
Filtrlə axtaran alıcı yalnız uyğun xanası doldurulmuş elanları görür. Sürətlər qutusu, ötürücü, rəng, yanacaq növü kimi xanalar boşdursa, elan axtarışdan kənarda qala bilər.
5. Telefona tez cavab verin
İlk 2–3 gün elan ən çox baxılan dövrdür. Cavabsız zəng alıcını növbəti elana aparır. WhatsApp ilə yazmağa icazə vermək də əlaqəni asanlaşdırır.
6. Qiyməti endirəndə alıcılar xəbər tutur
Qiyməti endirdikdə elan "Qiyməti enənlər" bölməsinə düşür, köhnə qiymət üstündən xətt çəkilmiş göstərilir — alıcı endirimi dərhal görür.
7. Kredit və barteri qeyd edin
Krediti və ya barteri qəbul edirsinizsə, bunu qeyd edin — bu filtrlərlə axtaran ayrıca alıcı kütləsi var.
8. Sənədləri hazır saxlayın
Texniki pasport, şəxsiyyət vəsiqəsi və (varsa) etibarnamə əlinizdə olsun — razılaşmadan sonra rəsmiləşdirmə gecikməsin.
9. Elanı yeniləyin
Elan siyahıda aşağı düşəndə "İrəli çək" xidməti onu yenidən yuxarı qaldırır, VIP və Premium isə elanı ana səhifədə ayrıca bölmədə göstərir.
10. Təhlükəsizliyə diqqət
Pulu almadan maşını və sənədləri təhvil verməyin. "Əvvəlcə kodu göndərin", "ilkin ödəniş edin" kimi xahişlər fırıldaqçılıq əlamətidir.